شهادة على احداث رمسيس ومسجد الفتح

عن #الجحيم الذي لا اصدق ان الله انجاني منه حتى الان ...
الزمان : من ظهر الجمعة ١٦ أغسطس الى عصر السبت ١٧ أغسطس ٢٠١٣
المكان : من مسجد #المحروسة بأحمد عرابي الى مسجد #الفتح برمسيس
صاحب الشهادة  : Mahmoudƺ Moustafa
----------------------------------------------------------------
15 أغسطس 20013

يوم الخميس كان يوما عصيبا فقد ودعت ثلاثة من الاصدقاء احدهم من أعز أصدقائي وهو اخي الحبيب وليد قنديل رحمهم الله وتقبلهم في الشهداء...

رجعت البيت الساعة ١٢ بليل وعرفت ان #الجمعة المسيرات هتخرج من المساجد ومنها مصطفى محمود...

نزلت من البيت قبل الصلاة قابلت على ناصية الشارع شباب رايحين فقالولي مسجد مصطفى محمود مقفول وعنده شرطة وجيش وكل الطرق المؤدية له مقفولة وهنصلي بداله في مسجد #المحروسة وركبنا وروحنا للمسجد بعد معاناه مع الطرق المقفولة من الشرطة والجيش...

صلينا الجمعه وربنا يغفر للامام كانت خطبه ناقص فيها يسبح بحمد #السيسي (والله زي ما بقول كدة مش مبالغه) وان اللي بيحصل ده مؤامرة غربية وقعد يسب ويلعن ف الغرب شوية وقال يعني ان احنا ماشيين ورا الغرب وكدة ..حسبنا الله ونعم الوكيل...

خلصت الصلاه وبدأت الهتافات (يسقط يسقط حكم العسكر) مدوية مزلزلة طالعه من حرقة الناس من خطبة الجمعة ..هتفنا شوية وبدأ تحرك المسيرة .. عدت على شبراوي ومشيت في أحمد عرابي وكان المنظمين بيحثونا على المشي بسرعة والتحام المسيرة عشان كان في تجمعات على الناحية التانية بسيطة من مؤيدين السيسي ومش عاوزينا نحتك بيهم...

وصلت المسيرة سفنكس ووقفنا شوية نستنى ٣ مسيرات جايين من جوامع قريبة من #المهندسين و #الدقي و #العجوزة..التحمت المسيرات واصبحت مسيرة كبيرة جدا لا يرى من بأولها آخرها..اتحركت المسيرة ولقينا كل الطرق مقفولة في وشنا الا كوبري ١٥ مايو .. طلعنا الكوبري وفضلنا ماشيين عليه لحد ما وصلنا عند الكورنيش وعلى يميننا #ماسبيرو...

اول ما نص المسيرة عدى الحتة دي طلع بلطجية من تحت الكوبري يمين من عند ماسبيرو وفي نفس الوقت بلطجية من على اسطح العمارات شمال الكوبري وبدأ الضرب من الجهتين بأزايز وطوب واطواق حديد وخرطوش..الشباب بدأ يتعامل مع البلطجية اللي تحت ومن فضل ربنا ان نص المسيرة احتمى في سور الكوبري الحديد منهم ونزل شباب من على الكوبري وطلعوا عالعمارات اللي عالشمال وشوفت شاب ملتحي بيشاورلنا من بلكونة بيت مهجور ان احنا نعدي ولقيت البلطجية اللي عالعمارات بيجروا بين اسطح العمارات وناس بتجري معاهم..احنا عدينا الحتة دي موطيين رؤوسنا وبنجري والضرب شغال وعرفت بعدها ان مش كلنا عدينا وان ناس مننا نزلت الزمالك ومكملتش ..الحمد لله احنا كملنا والضرب شغال وكان في اصابات كتير ..بعدها بشوية لقينا الناس بتحدفلنا ازايز مياه ساقعه من البلكونات واسطح العمارات وبتشاورلنا وتحيينا ...

فضلنا ماشيين وبنهتف والناس طول كوبري ١٥ مايو بتحيينا وتحدفلنا المياه لحد ما وصلنا تقاطع ١٥ مايو مع كوبري اكتوبر لقينا عربيات امن مركزي ومدرعات شرطة واقفين على كوبري اكتوبر وقافلينه في اتجاه الرجوع قبل التقاطع بحاجة بسيطة ..

احنا كملنا في طريقنا عادي رايحين #رمسيس وعديناهم وقبل ما نحصل #رمسيس بحوالي ٢٠٠ متر (في يافطة مكتوب عليها رمسيس ٢٠٠ متر) لقينا ضرب نار كثيف من قدامنا ولما سألت عرفت ان ده من عند قسم الازبكية .. وفجأة ببص ورا لقيت غاز كتير طاير ف الجو وانا كنت ف اول المسيرة فعرفت ان الداخلية بتضرب من ورا والغاز وصلنا وكان شديد..المشهد كان صعب جدا..متحاصرين عالكوبري ومفيش اي حتة نخرج منها ومفيش اي مكان نجيب منه خل وبيبس واحساس العجز وقلة الحيلة ساعتها خلى ناس كتير تنط من على شجرة كانت جنب الكوبري وبتنزل على تحت الكوبري وعرفت ان في ناس نطت من على الكوبري لان الضابط قالهم تنطوا او هنفتح النار...

فضلت واقف شوية مع الناس لحد ما الضرب قدام هدي شوية ولقينا ناس على الناحية التانية من القسم بيشاورولنا نعدي وبيفرقعوا العاب نارية فبدأنا نتحرك واحنا موطيين وايدينا فوق راسنا وبنجري..وفجأة ضرب النار رجع اشد من الاول وكأننا في حرب ومعدش قدامنا غير اننا نعدي لاننا كنا تقريبا قدام القسم وخدناها جري وناس بتقع ومحدش بيقربله من الرعب..والحمد لله وصلت الناحية التانية للناس اللي كانت بتشاورلنا وانا قلبي تقريبا توقف عن العمل ومش قادر اخد نفسي لقيت الناس بيجيبولنا مياه وحاجة ساقعة وقعدت على رصيف الكوبري القط نفسي واشرب وكان لسة في ناس بتيجي والضرب شغال..

مفيش ربع ساعة والواحد قاعد مش قادر يتحرك ولقيت الناس بتشجع بعض تقوم عشان في مسيرة جاية من شبرا ووراها بلطجية ..قومت لقيت الشباب بيجمع طوب واول ما دهلت المسيرة رمسيس بدأنا نتعامل مع البلطجية من فوق الكوبري..مطرناهم طوب لحد ما جريو بعيد مجزء منهم رجع وجزء راح ناحية القسم..

قعدت اريح على الرصيف لقيت الطيارة جت وقفت فوقنا قريب جدا وفضلت واقفة يجي ربع ساعة وشوفت ناس بتسقط حواليا وبيشيلوهم ويجروا بيهم من منزل الكوبري..الصراحة مع وقفة الطيارة دي والناس اللي بتقع واحنا واقفين على الكوبري وفي ناس بتحدف طوب عالقسم قدام وعاملين متاريس من الضرب..ساعتها انا اعصابي اتدمرت فعلا ومعدتش قادر اقف على رجلي فنزلت تحت وسط الناس في رمسيس ومقدرتش اقف على الكوبري أكتر من كدة...

نزلت صليت العصر وقعدت شوية شربت مياه وحاجة ساقعة وقومت اتمشى شوية بين الناس وساعتها رمسيس كان مفهوش موضع قدم غير الحدائق وكان لسة في مسيرات في الطريق ومش عارفة توصل..على الساعه ٥:٣٠ تقريبا كنت بعدت عن اخر الناس من ناحية شارع رمسيس وسمعت الناس بتقول في مسيرة جاية..شوية ولقينا عربيات جاية حوالي ٥ عربيات ملاكي في كل عربية ٤ رافعين آلي لفوق وملثمين وعربية منهم واحد فيها شايل علم الجهاد صغير ومكرمش وشكله لامؤاخذه طالع من بق كلب..الناس كلها قعدت تقول دول مش تبع الثورة وانا ساعتها قلقت وقعدت اسأل الناس دول تبعنا يا جدعان..لحسن يخشوا يفرغوا فينا..ومحدش عارف حاجة وناس كتير مشيت اول ما شافوهم وانا ساعتها روحت ناحية الفجالة وقفت هناك شوية متخيل اني بعيد عن الضرب وفجأة لقيت بلطجية داخلين علينا من هناك والناس بدأت ترد بالطوب لحد ما رجعوا البلطجية..الاعداد كانت مهولة ومفيش بلطجية تردهم ..

اذن المغرب فروحت اصلي في جامع #الفتح وصلينا على بعض الشهداء وبعد الصلاة الدكتور صلاح سلطان اتكلم ف الاذاعه وقال ان اخوانكم ف التحالف درسوا الامور ورأوا ان الكل يروح ونفضل طول الاسبوع مرابطين وفي فاعليات يومية..بعدها حد تاني اتكلم وقال محدش يمشي عشان في مصابين وجثث وهيحاصروا المسجد ومش هنعرف نخرجهم وقال ان الدكتور صلاح هيتكلم تاني..بعدها بدقيقتين الدكتور صلاح اتكلم وقال والله انا بلغتكم ما وصلنا اليه في التحالف بعد المشورة وقد اكون غير متفق ولكني انقل لهم الوضع وهذا ما يراه اخوانكم..بعدها حد خد المايك ورفض كلام الدكتور صلاح وقال لازم منمشيش والدكتور ضلاح هيتكلم تاني واستنينا لحد العشا والدكتور صلاح متكلمش وساعتها كان متاح للي عاوز يروح طريق واحد ناحية غمرة روح اللي روح وانا مرضيتش اروح عشان البلطجية وانا معرفش الشوارع هناك كويس وعشان ناس كتير ف المسجد فضلت مع المصابين والجثث ..بعدها بنص ساعه جه واحد قعد يعيط ويقول قولتلكوا روحوا اهو الجيش جه قفل كل الشوارع بالمدرعات هيموتونا هنا هيموتونا هنا ..

في نفس الوقت كان الضرب شغال بره المسجد وانا كنت قاعد على سلم المسجد من بره عند قاعة المناسبات وكل شوية ناس بتيجي مصابين وقتلى ومنساش منظر اتنين واحد مخه بره ولسة فيه النفس وواحد نص دماغه طايره وميت..حسبنا الله ونعم الوكيل..مفيش نص ساعه بالضبط ولقينا الضرب بره المسجد مباشرة وفي رصاص بيجي في حوائط المسجد فدخلنا وقفلنا علينا باب قاعة المناسبات وفضلت قاعد في القاعه وكانت هي المستشفى الميداني وبيتنقل فيها المصابين والموتى..ساعتها تقريبا كانت الساعة ٩:٣٠ ...

فضل الضرب شغال بره واحنا قافلن علينا الابواب ومش عارفين حاجة لحد تقريبا ١٠:١٥ الضرب هدي وسكت خااالص ..فضلنا في حالة الهدوء دي تقريبا لحد الساعة ١٢:٤٥ وسر حالة الهدوء ان قوات الجيش كانت واقفة على باب المسجد ومبيعملوش اي حاجة .. بعد الهدوء بدأت اول محاولات اقتحام المسجد وده حصل لما الجيش وقف تحت في الجنينة وعساكر الداخلية والبلطجية فضلوا يزقوا باب القاعة واحنا قافلينه وحاطين وراه كراسي ومكاتب..معرفوش يفتحوا الباب قاموا كاسرينه لبره وده كان حوالي الساعه ١:٠٠ ..ساعتها حدفناهم بالكراسي وزجاجات البيتادين والميكوجيل فرجعوا شوية فقفلنا مكان الكسر بالكراسي والجزامات والمكاتب بتاعة المسجد وفضلت حتة صغيره فوق خالص وعالاجناب..

الدنيا هديت بعد محاولة الاقتحام الاولى وفضلوا يتفاوضوا معانا نخرج واحنا رافضين عشان الحظر والبلطجية لحد الساعه ٢:٤٥ بدأت تاني محاولة اقتحام للمسجد وفضلنا نقاوم ونزق وهم يزقوا ويضربوا صوت عشان نرجع لحد ما ضربوا قنبلة غاز وقعت في قاعة المناسبات وكانت الساعة حوالي ٣:١٥ ..صمدنا حوالي ٥ دقايق وبعدها محدش استحمل كله جري على جوة وسيبنالهم باب القاعة ودخلنا المسجد وقفلنا الابواب وكان اثر الغاز في المسجد خانق وناااار في الوجه وفضل حوالي ساعتين بعد تشغيل التكييفات...

دخلنا المسجد جوة وكثفنا الكراسي والمكاتب ورا الابواب وسيبنالهم قاعة المناسبات وساعتها الامام شغل الاذاعة وفضل يتكلم عن حرمة الدماء واقتحام بيوت الله ويناشد اهالي المنطقة يقفوا جنب المحاصرين في المسجد وانهم عزل ومعهم مصابين وبعدها شغل قرآن لحد الفجر والدنيا هديت وصلينا الفجر وجه بعض الاهالي فعلا وجابولنا مياه ساقعه وعيش وفول وجبنه وباتيه ..على الساعة ٥:٠٠ حد قال في الاذاعة ان في واحدة بتموت من أثر الغاز ومحتاجة حقنة ادرينالين وياريت حد من الاهالي يجيبها ..للاسف محدش جابها والساعة ٥:٤٥ تقريبا اذيع خبر وفاة الاستاذه هبة ورأيتهم يكفنوها والبكاء يملأ المسجد ..قضي الامر وانا لله وانا اليه راجعون..

الساعة ٦:٣٠ بدأت ثالث محاولة لاقتحام المسجد وتصدينا لهم بفضل الله ولم يستطيعوا اقتحامه ..بعدها بدأت المحاورات والمفاوضات ..لواء قال لاحد المحاصرين معنا نخرج النساء امنين ويذهب الرجال لمعسكرات الجيش في عربات الامن المركزي للكشف عنهم وترك من صحيفته خاليه..طبعا قوبل بالرفض..بعدها طلبوا منا تسليم#شيماء صاحبة البث المباشر ورفضنا..بعد ذلك بدأ بعض الاهالي تيجي تحاول تاخد ذويهم المحاصرين واغلبهم بنات وفي ناس خرجت فعلا ..في ١٥ بنت خرجوا بعد وعدهم بالخروج الامن واول ما خرجوا قعدوهم جنب الحمامات تحت المسجد زي أسرى الحرب واحنا شوفناهم من الشباك..وفي بنتين خرجوا والبلطجية اتلموا عليهم هرسوهم ضرب والجيش والداخلية واقفين يتفرجوا..

الساعة ٩:٠٠ عرفنا ان في مسيرات جاية عشان تحررنا وبعدها بشوية عرفنا ان مفيش ولا مسيرة عارفة توصل وفي ناس كتير ضعفت وخرجت وللاسف البلطجية بيضربوهم وبعدين بيخشوا عربية الترحيلات...فضلنا كدة لحد الظهر وصلينا الظهر ومعدناش عارفين هنعمل ايه والدنيا كانت هادية لحد تقريبا ١:٣٠ ..

تقريبا الساعة ١:٣٠ بدأ خبط جامد على ابواب المسجد وبدأنا نستنفر تاني عالابواب وبالمناسبة المسجد له ٦ ابواب بابين في كل جهة والجهة الرابعة القبلة وباب يدخل على حجرة الامام وملحق بها دورة مياه صغيرة كنا نستخدمها طول مدة الحصار وسلم بيطلع على دور النساء وسطح المسجد ومفيش اي ابواب تاني للمسجد..والمأذنة اصلا غير ملحقة بالمسجد وملهاش باب يخرجةعليها..لما بدأ الخبط طلعنا عالابواب عشان محدش يدخل..فجأة بدأ صوت ضرب نار بعيد شوية فانا فكرت مسيرة جاية وبيضربوا عليها مفيش ٥ دقايق واتضربت قنبلة صوت جوة المسجد في نصه بالضبط وكلنا اتنفضنا وبدأ بعدها ضرب الآلي على حيطان المسجد من جوة لدرجة ان الحيطان من فوق بقت بتقع قدامنا والحيطة بتتخرم واترمت قنبلتين صوت تاني.. في الوقت ده كلنا كنا متسمرين جنب العمدان وضامين على بعض وكله كان بيتشاهد وفي واحد وقع جنبنا برصاصه جت في فخده ومحدش قدر يروح يشيله يوديه ناحية الدكاترة..

فضلنا في الوضع ده تقريبا ١٠ دقايق بعدها بدأ ضرب الغاز من الشبابيك..اول قنبلة غاز شالها واحد حطها في كولمان المياه بعدها اترمى ٤ قنابل ورا بعض لدرجة ان المسجد فجأه بقى شبوره وكنا هنموت من الحرقان في الوجه والخنقه المميته وكل الناس في نفس واحد ..افتح الباااااااااب..

جرينا عالباب اللي ناحية شارع رمسيس وفتحناه بسرعة وطلعنا نجري..الباب ده كان واقف عليه بلطجية لحد السور الحديد وفي الشارع شرطة وجيش وقوات خاصه لمحتهم وانا بجري..اول ما خرجنا جري البلطجية من شده الغاز ومن هلعنا وضرب القوات النار بكثافة وعشوائية طلعوا يجروا معانا لحد ما كله عدى عربيات الاسعاف اللي كانت واقفة اخر سور جامعةالفتح وكان واقف وراها الاهالي اللي طلعوا يجروا معانا من الضرب..ساعتها دخلت مع بعض الاهالي عمارة فتحنا بابها بالعافية والبواب كان بيزعقلنا عشان مندخلش...

دخلت العمارة ومعرفش ساعتها اللي خرجوا معايا اتفرقوا وراحوا فين بس واحد صاحبي دخل عربية اسعاف وقابلته بعدها وروحت معاه..المهم دخلت العمارة وكنت بموت من الغاز خدت جنب والاهالي قعدوا يتطلموا مع بعض على عنف الجيش زالشرطة واقتحامهم العجيب للمسجد وناس تقول في مسلحين بيضربوا من المأذنه وانا واخد جنب وساكت لحد ما الدنيا هديت والناس بدأت تخرج وانا مشةعارف اعمل ايه عشان ملتحي وباين عليا اثر الغاز .. راجل كبير من اللي دخل العمارة قاللي تعالى امشي معاي وخدني في ايده وخرجنا..واد بلطجي اول ما لمحني نزل عليا بخشبة وجاي يشدني قام الرجل شدني ولقيت شاب بيشدني معاه وبيقولوه ده معانا راجعين من الشغل..

عديت على اتنين بلطجية بنفس النظام وفضل الراجل ربنا يبارك له معايا هو والشاب لحد ما خرجنا من وسط الاهالي لمكان فاضي لقيت اتنين من اللي كانوا معايا جوه المسجد الحمد لله خرجوا..فضل معانا عم الحج لحد ما وصلنا لمترو العتبة وركبت المترو الحمد لله ووصلت البيت وانا مش مصدق اني خرجت ... الحمد لله رب العالمين ..

----------------------------------------------------------------

اسف جدا اني اتأخرت في كتابة شهادتي وما رأيته في اليوم العصيب ولكني لم افق مما حدث الا قريبا ووجدت كثير من الاصدقاء والحقوقيون يطلبون توثيق ما حدث ولاني علمت بعدها بأكذوبة المسلحين فوق المأذنة وانا لفيت المسجد خرم خرم ومفيش اي حاجة توصل للمأذنة من داخل المسجد من الاساس..

اعتقد ان التوقيتات اللي انا كاتبها دقيقة لاني كنت بتويت من الموبايل ورجعت للتويتات جبت التوقيت منها بالضبط..

اخيرا ... موت واحد من اعز اصدقائي #وليد_قنديل وفض اعتصام النهضة وحصار كلية هندسة ومن بعده احداث رمسيس وحصار مسجد الفتح كانت احداث متتالية اقسم بالله انها قد تهد جبلا لو تتابعت عليه ولكن لاننا لا عون لنا ولا حول ولا قوة الا بالله ولان اليأس كفر بالله عز وجل (انه لا ييئس من روح الله الا القوم الكافرون) ولأنه لا يهمنا بلوغ الهدف وانما يهمنا ان نموت على الدرب ..عشان كدة #مكملين بأذن الله . #مكملين بأذن الله . .